Ergayga Qaramada Midoobay u qaabilsan Soomaliya oo ka hadlay xiisada ka tagan Somaliland iyo Puntland

Ergayga Qaramada Midoobay u qaabilsan Soomaliya oo ka hadlay xiisada ka tagan Somaliland iyo Puntland

February 15, 2018 0 By walaal24

Ergayga Qaramada Midoobay u qaabilsan  Soomaaliya danjire Micheal Keating, ayaa soo dhaweeyay in Madaxweynaha Soomaaliya Maxamed Cabdillaahi Farmaajo iyo Madaxweynaha maamulka Somaliland Muuse Biixi Cabdi  ay ka go’antahay in xiisadda gobalka Sool ka taagan ee u dhaxaysa Somaliland iyo puntland lagu xaliyo wada hadal.

Danjire Micheal Keating, wuxuu sheegay in xiisadda gobalka Sool ay saamayn ku yeelanayso bulshada dhulkaas ku nool. Danjiraha oo u waramay warbaahinta,  mar ay wax ka weydiisay su’aal la xidhiidhay xiisadda Somaliland iyo Puntland oo uu kaga hadlay xarunta Qaramada Midoobay, waxyaabaha uu isleeyahay isaga ahaan way kaga beegantahay inuu ka qabto, wuxuu yidhi “Waxa aniga arrintan iiga aadan waa in colaadda u dhexeysa Somaliland iyo puntland ay tahay war aan wanaagsaneen Labada dhinac, dadka halkaas ku nool horayba waxa ay u dareemayaan inaanay helin taageeradii ay u baahnaayeen.

Nasiib xumo goobaha rabshaddu ay ka jireen waa deegaanno markii horeba abaartu ay aad u taabatay labada dhinac ee Somaliand iyo Puntland mana aheyn in ay ku fakaraan in ay dagaalamaan halkii ay ku fakari la haayeen dagaalka ka dhanka ah Al shabaab, in ay shaqo u abuuraan dadkooda iyo horumarinta nabadda, marka waxaa muuqda in tani ay tahay arrin siyaasadeed, waana in lagu xalliyaa wadahadal nabadeed.

Waxa yididiillada leh ayaa ah in madaxweyne Farmaajo uu sheegay in arrintaas ay tahay in lagu xalliyo Is fahan iyo nabad halka madaxweynaha cusub ee Somaliland sheegayna in arrintaa wadahadal lagu xalliyaa, khilaafka u dhexeeya Somaliland iyo Puntland ma ah mid wanaagsan oo waxtar u keenaya dadka halkaa ku nool dib u dhac ayuuna sababayaa waana war aad u xun marka la eego ammaanka iyo fayo qabka dadka Gobolkaa ku nool.”